Општата цел на проектот Вклучување на Националната агенда за општествена одговорност на претпријатијата (ООП) во главните текови – Поддршка за националната платформа за ООП е придонес кон одржлив економски раст, преку промоција на општествена одговорност на претпријатијата во општеството.

Цел на проектот е поддршка на вклучувањето на практиките и политиките на ООП во главните текови, во рамките на делувањето на различни чинители за ООП во Република Македонија.

Целна група се:

• Општата јавност и медиумите; и
• Клучните чинители во ООП, особено:
• Претпријатијата, особено МСП;
• Граѓански организации;
• Претставници на Владата.

Очекувани резултати од проектот се:

• Зголемена свест на јавноста за концептот и придобивките од ООП;
• Развиени капацитети и знаења на клучните чинители за ООП;
• Создадена поволна околина за развој на ООП.

Предвидени се три компоненти во рамките на проектот, за секој од планираните резултати.

Компонентата 1 ги вклучува следните активности: изработка на промотивни материјали за ООП, ООП караван, тематски форуми за ООП, медиумска кампања за ООП, како и интернет сајт за ООП и е-билтен.

Компонентата 2 вклучува обука на МСП, развивање на капацитетите на граѓанските организации (ГОи), обука на медиумите и градење капацитет на Националното координативно тело за ООП).

Компонентата 3 вклучува организација на доделување национална награда за ООП, известување од државните и приватните претпријатија за мерките за ООП кои ги спроведуваат, мапирање на потребните чекори за воведување ООП во процедурите за јавни набавки и консултации и експертска поддршка за креирање политики за работните групи на државните институции и Националното координативно тело за ООП.

Водечки партнер е Министерството за економија на Република Македонија, заедно со останатите три проектни партнери:

• Македонска развојна фондација за претпријатија (МРФП):
• Сојуз на стопански комори на Македонија (ССК); и
• Здружението Конект.

Проектот е поддржан од страна на 5 организации кои соработуваат со водечката организација и партнерите: Министерството за животна средина и просторно планирање, Организацијата на потрошувачи на Македонија, Конфедерација на работодавци, Независен синдикат на лицата со хендикеп Егалите и Стопанската комора на Северозападна Македонија.

Вкупниот буџет на проектот изнесува 394,285 ЕУР

Времетраењето на проектот е 24 месеци.